ائشیدیرسن می ؟ بیر سس اوزاقدان داهادا زنگین گلیر ، دوغرودور او سس ائلچینیمیزدیر.

آیاقا دوروب ساغ الین قویوب سینه سینین اوستونه و بوتون وارلیغیلا مارشی اوخویور....« بیز کئچمیشه گووه نه رک گلجه یه آتدیملاریق آذربایجان آذربایجان یاشا یاشا آذربایجان .....»

مامورلارین آیاق سسلری گلیر ، باغیریرلار ، اورا بورا قاچیرلار ، نه یازیقدیرلار بونلار. بیر گون اونلاردا بو مارشی اوخویاجاقلار ، کیم نه بیلیر بلکه همن مامورون قیزی یا اوغلو ایندی ائوده آتاسی بیلمه دن سیزین سیزین خبرلریزی اینترنت دن ایزله ییر.

ائله دیر ، ائولرده ، تاکسی لاردا ، کافی نت لرده ، باشگاه لاردا ، فاکولته لرده و ......... شهرلرین هامیسیندا سیزدن سؤز گئدیر.

مامورلاردا منیم تک ، سیزی الدن وئرن دن سونرا تانیاجاقلار سیزان کیم اولدوغونوزو ، داریخاجاقلار او زامان سیزه و سیزله اولدوغو زامان لارا. هرآن اؤزومه غضبله نیرم ، سیزدن یئته نه قدر اؤرگشمه میشم دییه.

آیدینیم ! ائوینیزه هر دفعه زنگ آچاندا ، آنان « نه زامان گلیرسن؟ » سوروشاندا «ائله باخ ایندی یولدایام گلیرم » دئییرسن. دوغرودور سن هر زامان یولداسان ، سنی کیمسه یولوموزدان دوردورا بیلمز. فرازیم ! آنانین خسته اولدوغون کسین اینجیتسین لر دییه یئتتیریبلر سنه اوردا.، آما بونون آجیسی سنی آیاقدان سالماییب و داغ کیمی دردلری ایچینه آلیب و اوجالیرسان.

ائلچینیم ! قارداشین آداخلی سینین عائیله سینه وئردییی سؤزو سیندیرمیش اولماسین دییه ، هئچ بیر شنلیک یاپمادان ، گلینین گتیریب ائوینه. آخی او عاییله ده سنسیز شنلیک الارمی؟! یادیما گلیر 3 ایل اؤنجه بیر یولداشیمیزین تویوندا بوتون یولداشلار ال اله وئریب رقص ائدیردیلر، نه ده ووقارلی رقص ائدیردین سن.

یولداشلارین بیر نئچه سیندن ایسته دیم سجادی بیر جومله ده تعریف ائدسینلر ، ان گؤزل جومله نی سن یازدین امیریم! دوغوردان دا تانریسان.

بیر میللتین نئچه تانریسی اولار ؟ هر گون تانری لاریمیزین ساییسی آرتیر. سیزی دوشونن ده سجده یوخ آیاق اوسته گوج له نیرم، سیزه دوشونن ده یئنی دن دوغولورام سانکی. هر بیرینیز امودسونوز ، طراوت سینیز ، گوجسونوز ، اینامسینیز.....

دوستاق سیزه عادت ائله مه دن ، سیزه باغلانمادان ، گلین ، آنالارینیز عوصیان فیکرینده دیرلر، بوتون شهرلریمیز داریخیب سیزه ، وطن عوصیان ائتمه دن گلین داها.

اینام آغاجی